Cárcel, asesinatos masivos y ensin xuiciu, tortures, malos tratos, robos de neños pequeños, trabayu esclavu… Los tribunales españoles siguen negando la xusticia a les víctimes del franquismu. Más de 80 querelles s’interpunxeron énte la Xusticia española nos últimos años y nenguna consiguió l’enxuiciamientu o investigación sobre los responsables d’estos delitos. El silenciu sigue vixente y tenemos que llevantar la voz pa que nos sientan.

 

La impunidá de los responsables directos y políticos caltiénse. La Llei d’Amnistía y otres normes torguen que los xulguen. Protexen a unos pocos mentes dexen ensin xusticia a cientos de miles de persones. Por eso dende CEAQUA, la Coordinadora Estatal d’Apoyu a la Querella Arxentina, tuvimos que cruciar l’océanu pa, n’aplicación de la xusticia universal, reclamar lo qu’equí nos nieguen.

 

“Llei de Memoria Democrática”. Con esi nome se conoz l’anteproyectu de Llei que va empezar a tratase nel Congresu llueu. Anque paecía abrir la posibilidá de que too diba camudar, la realidá ye bien distinta. Si nun se modifica, el pegollu más importante de la Memoria Democrática, la Xusticia, va volver tener los güeyos tapaos. ¿Hasta cuándo va siguir esto asina? ¡Tenemos qu’actuar, tenemos qu’impidilo!

 

 Por too eso queremos que t’axuntes a la nuestra llucha y esixas al Gobiernu y a toles diputaes y diputaos del Congresu, cola to firma, que:

 

• Se modifique, derogue o anule la Llei d’Amnistía

• Se modifique’l Códigu Penal incorporando al nuestru derechu’l principiu de llegalidá internacional

• Se ratifique pol Estáu español la Convención sobre la imprescriptibilidá de los crímenes de guerra y de lesa humanidá.

• Se modifique la Llei d’Enxuiciamientu Criminal pa que se revisen les resoluciones xudiciales qu’inalmiten les querelles hasta güei presentaes.

• Se modifique la Llei de Trataos Internacionales pa que puedan ser reconocíos y executaos los Dictámenes de los órganos de Naciones Uníes.

        

Una sociedá democrática nun pue deprender y superar los sos conflictos ensin Xusticia. Una Xusticia sesgada, pa namás unos pocos, nun ye Xusticia. Nun podemos dexar que l’Estáu español caltenga la impunidá del franquismu.